Ең үлкен ұшақ әуеге көтерілді

АҚШ-та тарихтағы ең үлкен ұшақ әуеге көтерілді. «Стартлонч системс» компаниясының «Рух» атты екі фюзеляжды әуе машинасы Мохаве шөлінен ұшырылған. Ол көкте 2,5 сағат қалықтап, жылдамдығын сағатына максималдық 304 шақырымға дейін арттырды. Ал, оның қанаттарының ауқымы  - 117 метр немесе америкалық бір футбол алаңына тең.

Лайнердің 28 дөңгелекті шассиі мен 6 қозғалтқышы бар. Ұшақтың ұзындығы - 73 метр, массасы - 250 тонна, әуеге 226 тонна жүк алып жүруге қауқарлы. Алып аспан кемесі ғарышқа аппараттарды жеткізу үшін пайдаланылмақ.  Инженерлер «Рухпен» келесі жылдан бастап спутник ұшыруды жоспарлап отыр.

Арай ТӨЛЕГЕНҚЫЗЫ