Жаңалықтарды Telegram арнамыздан оқыңыз!Атырауда Францияның алғашқы құрметті консулдығы ашылды. Бұл - өз кезегінде, екі ел арасындағы іскерлік байланыстың жылдан-жылға нығайып келе жатқандығының айғағы.
Қазіргі уақытта Қазақстан мен Франция арасындағы тауар айналымы жылына 6,5 миллиард еуроны құрап отыр. Бұл көрсеткіш алдағы кезде еселеп арта бермекші.
Бүгінде Қазақстанмен бірлесіп 200-ден астам француздық компания жұмыс істейді. Ал, елімізде тұрақты түрде қызмет ететін франциялық құрылымдардың жалпы саны 60-тың үстінде.
Олардың басым бөлігі мұнай-газ саласына жұмылдырылған. Айта кету керек, Франция еліміздегі ірі инвесторлардың біріне айналып отыр.
Олар елімізге 9 миллиард АҚШ доллары көлемінде инвестиция салған.
Ал, мұнайлы өңірде ашылған консулдық екі ел арасындағы әріптестік қарым-қатынасты одан әрі жандандыруға өз үлесін қоспақшы.
Франсис Этьен, Қазақстандағы Францияның Төтенше және өкілетті Елшісі:
Біздің басты мақсатымыз - Қазақстан мен Франция арасындағы қарым-қатынасты одан әрі дамыту. Қазақстанда 60-тан астам француздық компания қызмет етеді. Солардың көбі - осы Атырауда. Біздің консулдықтың да осы қалада ашылуы сондықтан.
Батырбек ҚУАНДЫҚҰЛЫ
