Жаңалықтарды Telegram арнамыздан оқыңыз!Ресей Федерациясының Халық әртісі, тележүргізуші Владимир Винокур мен белгілі саясаттанушы Юрий Солозобов ІІ дәрежелі «Достық» орденімен марапатталды.
Олар мұндай құрметке Қазақстан мен Ресей қарым-қатынасының нығаюына үлес қосқаны үшін лайық болып отыр.
Мемлекеттік марапатты тапсырған Қазақстанның Ресейдегі Төтенше және өкілетті Елшісі Марат Тәжин қазіргідей аумалы-төкпелі заманда халықтар арасындағы достық пен ынтымақтастықты арттыру маңызды екеніне тоқталды.
Салтанатты шара барысында Владимир Винокур мен Юрий Солозобов екіжақты байланыстарды нығайтуға алдағы уақытта да күш-жігерлерін аямайтындарын жеткізді.
Владимир Винокур, Ресей Федерациясының Халық әртісі, тележүргізуші:
Қазақстанда миллиондаған көзі ашық, көкірегі ояу көрермендерім бар екенін білемін. Сондықтан, алдағы уақытта елдеріңізге арнайы турмен баруды жоспарлап отырмын. Мұндай жоғары марапат арқылы менің екі ел достығына қосқан азғантай үлесімді жоғары бағалап жатыр деп ойлаймын. Сондықтан, білікті басшы, көреген саясаткер Нұрсұлтан Назарбаевқа және тұтас қазақ халқына көп рахмет!
Нұртас СОЛТАНҰЛЫ
