Мал шаруашылығын дамыту жөнінде үкіметтік бағдарлама қабылданады

Елімізде мал шаруашылығын қарқынды дамыту жөнінде арнайы үкіметтік бағдарлама қабылданбақ.

Бұл туралы Алматы облысына жұмыс сапарымен барған ҚР Премьер-Министрінің орынбасары, Ауыл шаруашылығы министрі Өмірзақ Шөкеев айтты. Өңірлердегі бизнес субъектілерімен кездескен министр жергілікті шаруашылық иелерін «Ет өңдеу мен өндіруге» байланысты жаңа бағдарламаның жоспарымен таныстырды.

Осының аясында алдағы 5 жылда еліміздегі жайылымдық жерлердің көлемі артып, салада 400 мыңнан астам жұмыс орны ашылатындығын жеткізді. Ал, бүгінде еліміз бойынша мал шаруашылығымен айналысатын 30-дан астам ірі шаруашылық пен 16 мыңнан астам фермер бар.

Өмірзақ Шөкеев, ҚР Премьер-Министрінің орынбасары, Ауыл шаруашылығы министрі:

- Осы шаруашылыққа ары қарай инвестиция құйып, мемлекет тарапынан қолдау көрсетіп, күш жұмсап, дамытып жіберу керек. Біздің бағытымыз 5-6 жылда үлкен шаруашылықтардың санын 100-ге, ал, фермерлардың санын 100 мыңға жеткізу.

Амангелді СЕЙІТХАН