Алғыс айтуға арналған сайт ашылды

1 наурыз «Алғыс айту» күні қарсаңында интернеттің қазақстандық сегментінде Raqmеt.kz атты жаңа сайт ашылды. Бұл сайтқа тіркелушілер кез келген тақырыпта, кез келген адамға ризашылықтарын білдіре алады.

Қазір қазақ тілінде жазатын блогерлердің басын қосқан Керекинфо блог плафтормасына тіркелген 4 мыңнан астам блогердің бірқатары жаңа сайтқа да өз тілектерін қалдырып үлгерген. Мұнда кез келген адамға, қоғамға, тіпті компания мен жансыз дүниеге де алғыс білдіруге болады. Ашылғанына бір күн болмаса да сайтқа жүзге жуық адам тілек қалдырған.

Олардың арасында Смағұл Сәдуақасов, Жұмабек Тәшенов сынды қайраткерлерге, «Жас Отан» жастар қанаты тәрізді қоғамдық ұйымдарға, «Ақтөбе» футбол клубы тәрізді командаларға да ризашылық білдіріп жатқандар бар. Сонымен қатар, атажұртқа оралған барлық қандастардың атынан барша қазақ халқына арналған алғыс та жарияланды.