Басты Жаңалықтар Елімізде жеке сот орындаушылары тапшы

Елімізде жеке сот орындаушылары тапшы

27.06.2014 05:30

Елімізде жеке сот орындаушылары тапшы. Облыстарда олардың саны 5-10 адамнан аспайды.

Ал, аудандарда мұндай мамандар атымен жоқ. Бүгін осы мәселелерді шешу үшін Сот актілерін орындау комитетінің өкілдері Астанада жиын өткізді.

Олардың айтуынша, қазір елімізде мемлекеттік сот орындаушылардың атқаруында 1 миллион 610 мың құжат болса, жеке сот орындаушылардың атқаруында небәрі 87 мың құжат бар.

Бұл атқарушылық құжаттардың жалпы мөлшерінің тек 6 пайызы ғана. Осы орайда, Сот актілерін орындау комитетінің басшылығы бірқатар ұсыныс жасады.

Мәселен, еліміздің қалалары мен облыстарында жеке сот орындаушыларын оқытатын арнайы курстар ашу, сондай-ақ, мемлекеттік құзырлы органдар мен жеке сот орындаушылар институттарының арасында тығыз қарым-қатынас орнату.

Ғалымбек Смағұлов, Республикалық жеке сот орындаушылар алқасы төрағасының орынбасары:

Бүгінде банктер заң бойынша біздің сот орындаушысының қаулысын орындамайды. Ал, біз олардан жеке тұлғаларға қатысты мәліметтер ала алмаймыз. Мемлекеттік органдар біріге отырып, осы мәселелерді қарау керек.

Айдана ҮСЕНБАЙ

Бөлісу