Басты Жаңалықтар Жастар жалақысын ала алмай жүр

Жастар жалақысын ала алмай жүр

23.06.2014 05:30

«Жасыл ел» жастар еңбек жасағының құрамында тынымсыз еңбек етіп жүрген қыз-жігіттер жалақысын уақытылы алмайды. Бұл туралы ел Президенті жанындағы Жастар саясаты жөніндегі кеңестің 18-ші көшпелі отырысында айтылды.

«Жасыл ел» жобасы қолға алынған 9 жыл ішінде оның құрамына 200 мыңнан аса қыз-жігіт кіріп, республиканың барлық аймағына 44 миллион түп көшет егілді. Биыл 13 мың жас жасылелдіктер қатарына қосылып, туған жерін түлетуге атсалыспақ.

Ол үшін 400 миллион теңге қаражат бөлінді. Алайда, еңбек жасағының жұмысына тұсау болар мәселелер жетерлік. Жалақы көлемі тым төмен, оның өзін жастар уақытылы ала алмай жүр. Студенттер арасында ақпараттық-насихаттық жұмыс тиісті деңгейде жүргізілмейді. Сол себептен, жасаққа келіп жұмыс істеуге ниеттілер қатары сиреп барады.

Рахат Хамидуллин, «Жасыл ел» жастар еңбек жасақтары республикалық штабының жетекшісі:

Кейбір облыстар мен қалалар осы «Жасыл ел» бағдарламасына қаражат бөлмейді. Соңғы екі жылда «Жасыл ел» сарбаздары өз жалақысын өте кеш алуда. Көп сұрақ қозғалды. Болашақта сол сұрақтардың барлығына толық шешім табылады, деген ойдамыз.

Гүлжан ҚАЛТАЙҚЫЗЫ

Бөлісу