Басты Жаңалықтар ОҚО: Шардара ауданында еңбекті сүйген жан тұрады

ОҚО: Шардара ауданында еңбекті сүйген жан тұрады

04.06.2014 08:30

Әлмахан Өтеновтің бойының тым аласа екендігіне қарамастан төрт құбыласы тең. Туа біткен дене кемістігіне мойымаған азамат қазір жеке шаруашылық құрып, ісін дөңгелетіп жүр.

Әлмахан Өтеновтің таң атысымен жұмысы шаруа қожалығына барумен басталады. Егіндікке диқан өз көлігімен жетеді. Ол бойының тым аласа екендігіне қарамастан, көлігін өзіне ыңғайлап алған.

Қазақстан ауылында тұратын азаматтың 20 гектар жері бар. Оған жылда қауын-қарбыз егіп, нәпақасын табады. Биыл бақша өнімдерінен бөлек, мақта өсіруді де қолға алып отыр.

Осылайша, табиғатынан ширақ жан өзгелерден қалыспай тірлігін жасап, ісін ілгерілетіп келеді.

Әлмахан Өтенов, кәсіпкер:

Ергежейлілігімді ойыма да алмаймын. Біреудің қол астында жұмыс істеп, жалданып жүрген жоқпын. Жер өзімдікі, не ексем де. Қаласам, жүгері егемін.

Техниканың тілін жақсы білетін азамат кезінде жолаушы тасымалдаумен де айналысқан. Қазір көлігі бұзыла қалса, өзі жөндеп алады. Ауылдастарына да көмектеседі.

Әлмахан Өтенов биыл 50-ді еңсерді. Жанында демеу болар жары Диларам бар.

Диларам Хатамова, жұбайы:

Төрт қыз сүйіп отырмыз. Жолдасым еңбекқор. Қыздарымыз өсіп жатыр, ешкімнен кем емес. Жақсы тұрамыз.

Тұңғышы - Жансая 9-да болса, кенжесі - Айзере 1 жастан асты. Бірлігі мен тірлігі жарасқан отбасы - өмірге құштар жанның мықты тірегі, ертеңгі жарқын күндерге жетелейтін ақжолтай тілегі.

Айнұр АҚБАЕВА

Автор

Айнұр Ақбаева

Бөлісу