Жаңалықтарды Telegram арнамыздан оқыңыз!Соңғы төрт айда тұтқындаудың орнына балама ретінде 875 адамға кепілдік жазасы қолданылған. Бұл туралы бүгін Орталық коммуникациялар қызметіндегі брифингте Бас прокурордың орынбасары Нұрмаханбет Исаев хабарлады.
Тұтқындаудың орнынан кепілдікті қолдану туралы шешім былтыр қарашада шыққан. Содан бері жазалаудың бұл түрі кеңінен қолданыла бастаған.
Бас прокуратура өкілі елімізде қылмыстық жағдай тұрақты деді. Ауыр және аса ауыр, яғни адам өлтіру, тонау мен қарақшылық қылмыстары айтарлықтай азайған.
Келесі жылдан бастап жаңа Қылмыстық іс жүргізу кодексі күшіне енетінін ескерсек, Бас прокуратура аталған жаңа құжат жүйелі жұмыс істеп кетуіне бағытталған жұмыстарды қолға алып отыр. Жиында сондай-ақ «Құқық қорғау қызметі туралы» Заң жобасының талқылау барысы да сөз болды.
Нұрмаханбет Исаев, ҚР Бас прокурорының орынбасары:
Бүгінгі күні 100 арызданушының 90-ы 3 күн ішінде өздерінің шағымдары бойынша қандай шешім қабылданғанын біле алады. Біздің мақсат -заңсыздықтарды мүлдем болдырмау. Соған байланысты «Құқық қорғау қызметі туралы» Заңға азаматтардың конституциялық құқықтарының өрескел және жүйелі түрде бұзылуына жол бергендері үшін аумақтық орган басшысын жұмыстан босатуды ұсындық. Бұл қауіпсіздік кеңесі тарапынан қолдау тапты.
Дулат АБИБУЛЛАЕВ
