Басты Жаңалықтар Кәсіпкерлерге кедергі көп

Кәсіпкерлерге кедергі көп

27.03.2014 05:30

Кәсібін дөңгелетемін, деген кәсіпкерлердің жолындағы кедергілер азаймай тұр. Бұл қоғамдық мониторинг жүргізу барысында анықталды. Сауалнамаға еліміздің барлық өңірінен 13 мыңға жуық кәсіпкер қатысқан.

Әрбір үшінші кәсіпкер өзіне көрсетілетін қызметке көңілі толмайды. Мамандардың айтуынша, мемлекеттік органдар тарапынан көп құқықбұзушылық анықталған.

Кәсіпкерлерден түскен арыз-шағымдардың көбі сәулет-жоспарлау тапсырмасын алу, тауарларды өткізу, жер телімдерінің мақсатты қолданылуын өзгертуге рұқсат беру кезіндегі кедергілерге қатысты.

Мәселен, Ақмола облысының Мемлекеттік Сәулет құрылыс бақылау департаменті лицензиялауды қайта рәсімдеу кезінде заңнамада қарастырылмаған салық органының анықтамасын сұраған.

Заңсыз құжаттарды сұрау деректері Шығыс Қазақстан мен Павлодар облысында да тіркелген. Мамандар бұл олқылықтарды жою мақсатында сауалнама нәтижесін ел Үкіметі мен Мемлекеттік қызмет істері агенттігіне жібермек.

Ербол Үстеміров, ҚР ҰКП Қоғамдық мониторинг департаменті директорының орынбасары:

«Бизнестің жол картасы-2020» бағдарламасындағы субсидия беру қызметі бойынша көптеген заңбұзушылықтар бар.

Сәуле АЛДАМҰРАТҚЫЗЫ

Бөлісу