Басты Жаңалықтар К.Өтемісоваға қатысты сот ісі басталды

К.Өтемісоваға қатысты сот ісі басталды

26.03.2014 08:30

Бүгін Алматыда қалалық соттың бұрынғы судьясы Күлпәш Өтемісоваға қатысты сот ісі басталды. Отырыс ашық түрде өтіп, оған айыпталушының туған-туыстары мен бұқаралық ақпарат құралдарының өкілдері қатысты.

Қамауда отырған Өтемісова Қылмыстық Кодекстің 350-ші бабының 2-ші тармағы бойынша айыпталуда. Яғни, әділетсіз сот үкімін, шешімін немесе өзге де сот актісін шығару бойынша.

Естеріңізге сала кетейік, өткен жылдың 28-ші наурызында кәсіпкер Сутягинский қаруды заңсыз сақтап, адам өлтіруді ұйымдастырғаны үшін 12 жылға бас бостандығынан айырылған.

Алайда, 12-ші тамызда айыпталушының жазасы 6 жылға шартты түрде жұмсартылған. Осы істе апелляциялық соттың судьясы ретінде Күлпаш Өтемісова төрелік еткен.

Кейіннен кассациялық сот алқасы апелляциялық алқаның шартты мерзім туралы қаулысының күшін жойып, бастапқы үкімді қалпына келтірді. 6-шы қыркүйек күні әділетсіз сот үкімін шығарғаны үшін істі жүргізген Өтемісова қамауға алынды.

Владимир Попов, Күлпәш Өтемісованың адвокаты:

Менің қорғауымдағы Өтемісова Конституция шеңберінде шешім қабылдаған. Ал, Сутягиннің ісіне қарасты жазаның жеңілдетілген себебі, оның жазасын дәлелдейтін толық фактілер болмады. Қазір біз құжаттарды жинақтап, куәгерлердің тізімін жасаудамыз.

Әйгерім МУСИНА

Бөлісу