Басты Жаңалықтар Инкассаторларға шабуылдаған қарақшылар ісіне қатысты үкім шықты

Инкассаторларға шабуылдаған қарақшылар ісіне қатысты үкім шықты

07.03.2014 05:30

Бүгін Алматыда «Трэвэл экспресс» компаниясының инкассаторларына шабуыл жасап, бірін жаралап, енді бірін атып өлтірген қаскөйлерге қатысты сот үкімі шықты.

Шешім бойынша қарулы жасақ жетекшісі Хаваш Мұхадинов 20 жылға, Андрей Танаков 19 жылға бас бостандығынан айырылды. Енді олардың жеке заттары мен дүние-мүлкі тәркіленіп, қос айыпталушы жазаларын қатаң режимдегі түзету мекемесінде өтейді.

Ал Танаковтың тапаншасын жасырып, қылмысты ұйымдастырды деп айыпталған Сергей Авдяков 7 жылға бас бостандығынан айырылды. Естеріңізде болса, оқиға өткен жылдың 26-шы қыркүйегінде болған. Сәтпаев пен Желтоқсан көшелерінің қиылысында туристік фирманың қос күзетшісіне белгісіз біреулер оқ жаудырып, қомақты қаржыны тартып әкетуге әрекеттенген.

Алайда, инкасаторлар қарсылық танытып, бұзақылар ақшаны алып үлгермеді. Дегенмен атыс кезінде компанияның қызметкері Олег Крылов оқиға орнында мерт болса, Андрей Сивченко ауыр жарақатпен ауруханаға жеткізілген.

Андрей Сивченко, жәбірленуші:

Соттың шығарған үкімімен толық келісемін. Алайда айыпталушылардың жүзінен өкініш байқамадым. Маған әлі аяғыма операция жасап, ішінде қалған екінші оқты шығару керек. Солардың кесірінен ІІ топтағы мүгедек болып қалдым.

Айыпталушылар сот шешімімен келіспейтіндерін айтып, алдағы күндері істің қайта қаралуын талап етпек ниетте. Жәбірленуші мен айыпталушылар арасындағы текетіресті қорытынды жаңалықтарымыздан көре аласыздар.

Әйгерім МУСИНА

Бөлісу