Басты Жаңалықтар Жетісу облысы диқандары 585 мың тонна қант қызылшасын жинамақ

Жетісу облысы диқандары 585 мың тонна қант қызылшасын жинамақ

29.09.2026 17:12

Жетісу облысының диқандары қант қызылшасын жинауға кірісті. Биыл өңір шаруалары 14 мың гектарға жуық алқапқа тәтті түбір отырғызған. Одан 585 мың тонна өнім алуды жоспарлап отыр. Егін жинау науқаны әдеттегіден бір апта ерте басталды. Қазір қос бірдей қант зауыты шикізат қабылдап жатыр.

Вячеслав Поляков қант қызылшасын өсіруді кәсіпке айналдырғалы бес жылға жуықтады. Содан бері өнімін келісіне 40 теңгеден өткізіп келеді. Оның 15 теңгесін қант зауыты, 25 теңгесін мемлекет субсидия ретінде төлейді. Бұған қоса арзандатылған жанар-жағармаймен қолдау көрсетіледі. Алайда кәсіпкер соңғы жылдары өндіріс шығындары айтарлықтай арты деп отыр. Сондықтан өнімнің сатып алу бағасы көтерілгенін қалайды.

Вячеслав Поляков, шаруа:

Бес жыл бұрын қант қызылшасының келісіне 40 теңге төленетін. Ол кезде бұл баға тиімді еді. Бірақ содан бері бәрі қымбаттады. Жанар-жағармайдың да, қосалқы бөлшектердің де бағасы өсті. Ал өнімнің бағасы сол күйі өзгермей тұр. Сондықтан, менің ойымша, сатып алу бағасын көтеру керек.

Биыл Жетісу облысында қант қызылшасы 13,5 мың гектар алқапқа егілген. Шаруалар озық технологияларды қолданып, әр гектардан орта есеппен 445 центнер өнім жинап жатыр. Жауаптылардың айтуынша, өндіріс шығындары артқанына қарамастан, қант қызылшасы әлі де табысты дақыл саналады.

Бақтияр Шампиков, облыстық а/ш басқармасы басшысының орынбасары:

Жасалып жатқан агротехникалық карталарға сәйкес, бүкіл шығындарды есептегенде қант қызылшасы ең тиімді дақыл болып саналады. Сондықтан қазіргі уақытта биылғы жылы бағаны көбейту мәселесі қарастырылмайды.

Жетісу облысында қант қызылшасын өңдейтін екі зауыт бар. Олар биыл маусым соңына дейін 690 мың тоннаға жуық шикізат өңдеуді жоспарлап отыр. Қазір Көксу қант зауытының қоймасына алғашқы 6 мың тонна қант қызылшасы жеткізілген. Кәсіпорын өндіріс көлемін арттыру үшін техникалық жетілдіру жұмыстарын жүргізіп жатыр.

Алтынбек Абатов, Көксу қант зауытының директоры:

Модернизацияның бірінші кезеңі бітті. Екінші кезеңі жалғасуда. Енді тәулігіне екі мың тонна болса, өңдеуді екінші кезеңде 3 мың тоннаға шығуымыз керек. Негізгі біздің мақсатымыз – сол зауыттың қуаттылығын 5 мың тоннаға шығару.

Соңғы бес жылда Жетісу облысында қант қызылшасы егілетін алқап көлемі 3,5 есе ұлғайған. Ал қант өндіру көлемі де 25 мың тоннадан 100 мың тоннаға дейін артты. Осылайша өңір еліміздегі қант өндіретін негізгі аймақтардың бірі ретіндегі орнын нығайтып келеді.

Автор

Нұрдаулет Сыздық

Бөлісу