Ерлан Қарин мемлекеттік байланыс орталықтарының жұмысын жақсартуды тапсырды

Ерлан Қариннің төрағалығымен мемлекеттік органдардың байланыс орталықтарын жетілдіру мәселесі талқыланды. Басты назар – халықпен кері байланысты күшейтуге және азаматтардың мәселесін жедел шешуге аударылды. Мемлекеттік байланыс орталықтары жыл сайын 21 миллионнан астам қоңырау қабылдайды. Былтыр I-Komek орталықтарына түскен 4 миллион қоңыраудың жартысынан көбі елордаға тиесілі болған. Осыған байланысты Вице-Президент Астананың I-Komek орталығының тәжірибесін басқа өңірлерге енгізуді тапсырды. Сонымен қатар мемлекеттік органдардың фронт-офистерін бірыңғай платформаға біріктіру және жасанды интеллект құралдарын кеңінен пайдалану көзделіп отыр.