Орманшыларға заманауи техника берілді

Елімізде орман өртінің алдын алу үшін заманауи бақылау жүйелері енгізілді. Енді мамандар тілсіз жауды ерте анықтайтын кешендер, дрондар, бейнебақылау және байланыс құралдарын пайдаланады. Бұл технологиялар өрт қызыл жалынды дер кезінде байқап, оны жылдам ауыздықтауға мүмкіндік береді. Осы бағытқа Үкімет 17 миллиард теңгеге жуық қаржы бөлді. Бұл сомаға өңірлерге өртті ерте анықтайтын 14 кешен сатып алынды. Қаржы  жеті өңірге берілді. Оның ішінде   Ақмола облысына – 4,8 миллиард, Алматы облысына – 3,3 миллиард, Қарағанды облысына – 3 миллиард теңгеден астам қаржы қаралған. Сондай-ақ Түркістан, Шығыс Қазақстан, Қостанай және Павлодар облыстары да заманауи жүйелермен қамтылады.