Қазақстанда 38 градусқа дейін аптап ыстық болады

Елде аптап ыстық болады. Қазгидромет мамандары күндіз республиканың бірден 12 өңірінде +35+38°С-қа дейін қатты ыстықты болжап отыр.

Бұл Атырау, Ақмола, Павлодар, Шығыс Қазақстан, Алматы, Жамбыл, Абай, Жетісу облыстары мен Қарағандының батыс, оңтүстік аймақтарын, сондай-ақ Қостанай облысының оңтүстігі мен Ақтөбе, Ұлытау өңірлерін қамтиды. Кей өңірлерде найзағай ойнап, жаңбыр жауады. Мәселен, еліміздің солтүстігінде күндіз қатты жауын күтілсе, батыс, солтүстік-батыс, солтүстік және орталықта бұршақ жауып, дауыл болуы мүмкін. Сондай-ақ солтүстік-батыс, солтүстікте түнде және таңертең тұман болады деп болжанып отыр.