Трамп Иранға соққы беруден бас тартқанын мәлімдеді

АҚШ президенті Дональд Трамп Иранға бейсенбінің кешінде соққы беру райынан қайтты. Ақ үй басшысы мұны Тегеранмен арадағы келіссөздерде ілгерілеу бар екенімен түсіндірді. Бұған қоса Трамп апта соңында бейбіт келісімге қол қойылуы мүмкін екенін меңзеп, оның уақыты мен орны таяуда мәлім болады деді. Ал бірнеше сағаттан кейін Иран тарабы Тегеран мәмілеге қатысты ақырғы шешімге келген жоқ деп мәлімдеді. Мұны елдің сыртқы істер министрлігінің ресми өкілі Эсмаил Багаи жеткізді. Оның айтуынша, қазіргі уақытта бұл мәселені сәйкес органдар қарастырып жатыр.