Дүниежүзілік денсаулық сақтау күні: Мектептерде ашық сабақ өтті

Оқушылар үшін бұл жай ғана кездесу емес. Олар есімі әлемге танылған спортшымен бірге сабақ арасындағы үзілісте жасауға болатын жаттығуларды қайталады. Дмитрий Баландиннің айтуынша, мұндай сергіту сәттері оқушының ойын жинақтап,  сабаққа ширақ отыруына септігін тигізеді. Жиын барысында өскелең ұрпаққа салауатты өмір салты, дұрыс тамақтану, белсенді қозғалыс пен ұйқы режимін сақтаудың маңыздылығы түсіндірілді. Балалар да сауалдарын қойып, белсенділік танытты. Оларды әсіресе «гаджетке тәуелділіктен қалай арылуға болады?», «кәсіби спортпен айналыспай-ақ денсаулықты сақтау мүмкін бе?» деген сұрақтар қызықтырды. Денсаулық сақтау вице-министрінің айтуынша, соңғы 10 жылда қазақстандықтардың 40 пайызы салауатты өмір салтын ұстануға көшкен. Алайда, балалар арасындағы артық салмақ мәселесі әлі де өзекті. Осыған байланысты бүгінде мектептегі тамақтану сапасына баса назар аударылып отыр. Елімізде жасөспірімдерге энергетикалық сусындарды сатуға тыйым салынып, мектеп асханаларында жаңа стандарттар енгізілді.