Трамп мәлімдемесінен кейін мұнай 1%-ға арзандады

АҚШ президенті Дональд Трамп Иранның энергетикалық нысандарына соққы беру мерзімін сәуірге қалдырды. Сондағы мақсаты – Тегеранмен соғысты тоқтату жөнінде келіссөз жүргізу.

Трамптың сөзінше, шабуылға он күн үзіліс жариялау жайындағы шешім Ислам Республикасының өтініші бойынша қабылданды. Алайда, қарсы жақ мұны жоққа шығарып отыр.

Айта кетсек, АҚШ пен Израильдің Иранға қарсы соғысы төрт апта бұрын басталып, бүкіл Таяу Шығысқа тарап, мыңдаған адам қаза тапты. Қарулы жанжалдан жаһан экономикасын теңселіп, энергия бағасы көтеріліп, дүниежүзіне қымбатшылық қаупі төніп тұр.

Соңғы мәліметке қарағанда, Трамптың мәлімдемесінен кейін әлем нарығында Brent маркалы мұнай 1 пайызға арзандап, 107 долларға дейін төмендеді.