Талдықорғандық қолөнер иелері қайырымдылыққа атсалысуда

Талдықорғандық қолөнершілер ісмерлікпен қатар, қайырымдылықты да қатар алып жүр.

Сан кәсіпті меңгерген шеберлер қыш құмыра, тоқыма бұйымдары және түрлі сәндік аксессуарларын жәрмеңкеде сатып, түскен қаржыны қаладағы қолөнер мектебіне бағыттайды. Жиналған қаражат онда білім алып жүрген мүмкіндігі шектеулі балаларға қажетті құрал-жабдықтар мен бұйым шикізатын алуға жұмсалады. Бұл бастамаға қала тұрғындары да қуана атсалысып жүр. Шеберлердің сөзінше, игі іс қам көңіл балалардың қолөнерге қызығушылығын арттырып қана қоймай, олардың жаңа туынды жасауына мүмкіндік береді.

Сәлима Өтебаева, қолөнер шебері:

Осы жәрмеңкелерде мүмкіндігі шектеулі балалардың өнер мектебінен шыққан бұйымдары сатылады. Бұл күнделікті балалардың өзінің өнерге деген мүмкіндіктерін, өнер жағынан қанаттандыра түседі. Өйткені өздерінің өмірдегі жолдарын тауып кетуге көмектесіп жатады.