Мәскеуде Ә.Бөкейхановтың бюсті орнатылды

Мәскеуде қазақтың көрнекті қоғам және мемлекет қайраткері Әлихан Бөкейхановтың 160 жылдығына орай бюсті орнатылды. Ол Халық шаруашылығы жетістіктері көрмесіндегі Қазақстан павильонында орналасқан. Енді Мәскеу тұрғындары мен қонақтары павильонға келіп, Әлихан Бөкейхановқа өз құрметін білдіре алады. Жиналғандар алаштың ардақтысына ескерткіш орнату игі іс екенін алға тартты. Осыдан бірнеше жыл бұрын Ресейде ұлт қайраткеріне арналған кітап та шығарылған еді. Дәурен Абаев, Қазақстанның Ресейдегі төтенше және өкілетті елшісі:

Әлихан Бөкейханов Ресей империясы Мемлекеттік Думасының жұмысына қатыса отырып, қазақтар мен басқа да байырғы халықтың мүддесін қорғады. Ол көпұлтты бірлік пен прогреске сенді және оның мұрасы бүгін ел арасындағы стратегиялық әріптестік қағидаттарында көрініс табуда.