Жетісу облысында жасөспірімдерге қатысты 163 заң бұзушылық тіркелді

Жетісу облысында екі күнде жасөспірімдерге қатысты 163 заң бұзушылық тіркелді. «Жасөспірім» жедел-профилактикалық іс-шарасы аясында 140 жас жауапқа тартылып, тағы 3 бала бейімдеу орталығына жеткізілді. Ережені елемегендердің 100-ден астамы түнгі уақытта ата-анасының қарауынсыз жүрген. Бұдан бөлек, кәмелетке толмағандарға алкоголь және темекі өнімдерін сатқан дүкендер мен көңіл көтеру орындары анықталды. Ал бала тәрбиесіне қатысты міндеттерін тиісінше орындамағаны үшін 16 ата-ана әкімшілік жазаға тартылды. Облыстық полиция департаменті рейдтік шаралардың әлі де жалғасатынын ескертеді.

Бексұлтан Әнетұлы, облыстық ПД ақпараттық саясат бөлімінің аға инспекторы:

Егер жасөспірім 16 жасқа толмаған болса, оның әрекеті үшін ата-анасы немесе заңды өкілдері жауап береді. Тәрбиелеу жөніндегі міндеттерін тиісінше орындамағаны, кәмелетке толмаған баланың түнгі уақытта заңды өкілінсіз үйден тыс жерде жүруіне жол бергені, сондай-ақ құқыққа қарсы әрекеттерге жағдай жасағаны үшін ата-аналар да әкімшілік жауапкершілікке тартылады.