Мемлекеттік секторда AI-агенттер саны артады

Былтыр шілдеде Alem.cloud Ұлттық суперкомпьютерлік орталығында NVIDIA чиптеріне негізделген суперкомпьютерлік кластер пайдалануға берілді. Бұл – Орталық Азиядағы ең ірі есептеу кешені. Әлемдік TOP-500 рейтингінде 86-орынға ие болды.

Ерекше айтып өтетін жайт, есептеу ресурстарын барлық мемлекеттік орган пайдалана алады. Сондай-ақ былтыр Ұлттық жасанды интеллект платформасы іске қосылды. Қазіргі таңда платформаны мыңдаған қызметкер пайдаланып отыр. Енді мемлекеттік басқарудың әртүрлі салаларында қолданылатын 50-ден астам AI-агент әзірленіп жатыр. 

2025 жылы барлық негізгі мемлекеттік органдарды қамтитын 20 цифрлық трансформация картасы бекітілді. Цифрлық трансформация карталары классикалық IT-бағдарламалардан түбегейлі ерекшеленеді. Бұл – экономиканың және әлеуметтік саланың 72 бағыты бойынша процестерді өзгертуге арналған жол карталары.