Польша фильмдерінің «Висла» фестивалі басталды

Алматыда Польша фильмдерінің «Висла» фестивалі басталды. Кино апталығында Еуропа мемлекетінің үздік туындылары көрсетіледі. Мәдени шара қос ел арасындағы байланысты жақындастырып қана қоймай, халықтар достығын да нығайтады. Көрермен назарына қандай фильмдер ұсынылды?
«Шаруалар», «Күдікті», «Сол сәтте» - Польша киноиндустриясының таңдаулы туындыларының бірі. Кинокартиналар көрерменге терең ой салып, ерекше әсер сыйлайды. Фильмді тамашалауға Польша мәдениетіне қызығатындар көптеп жиналған. Олардың арасында Сергей Яценко да бар. Алматылық тұрғын киноны тамашалап, ондағы өмір салтын терең зерттеуге, поляк тілін жетілдіруге ниетті.
Сергей Яценко, қала тұрғыны:

Бүгінгі фильмді алғаш рет көргелі отырмын. Кинотеатрда тамашалау ерекше әсер сыйлайды. Осы киноапталығының барлық туындысын көріп шығуды жоспарлап отырмын. Бұл - менің поляк тілін терең меңгеруіме үлкен мүмкіндік. Қазір Польша киноиндустриясы әлемдік үздіктердің қатарында екенін атап өткім келеді.

Польша фильмдер фестивалі бұған дейін Астана қаласында өтті. Енді, міне, жоба Алматыда да ұйымдастырылды. Мегаполис тұрғындары үшін комедия және драма жанрларындағы 7 толық метражды фильм, сондай-ақ 10-нан аса қысқа форматтағы туынды ұсынылмақ. Кинокартиналар түпнұсқада, аударма субтитрлерімен көрсетіледі. Ұйымдастырушылардың сөзінше, бұл бастама қазақстандық көрерменге поляк киноөнерінің жаңа қырларын ашуға мүмкіндік береді.
Дариуш Шевчык, Польша Республикасының Алматыдағы бас консулы:

Бұл фильмдер бұған дейін бірнеше мемлекетте көрсетілді. Польшаның соңғы уақытта түсірген ең үздік туындыларын таңдап алдық. Тіпті, олардың арасында «Оскар» жүлдесіне үміткер, 5 үздік фильмнің қатарына кірген туынды да бар. Бұл фестивальдің маңызы зор, себебі, қос мемлекет арасындағы достық қарым-қатынасты одан әрі жақсарта түседі.