Көлік пен мүлік салығына қатысты өзгерістер

Қозғалтқыш көлемі 4 литрден асатын көлік иелеріне 500 мыңнан бастап 800 мың теңгеге дейін салық салынса, келер жылы мөлшерме азаяды. Енді олар шамамен 460 мың теңге салық төлейді. Сондай-ақ, жер мен мүлік салығында да біршама өзгеріс бар. Ол қандай өзгерістер? 
Келер жылдан бастап жаңа салық кодексі күшіне енеді. Соның ішінде көпшілік көлік салығын асыға күтіп отыр. Өйткені, темір тұлпар кей отбасының табыс көзі ескерсек, салықтан түсетін салмақ айтарлықтай жеңілдемек.

Қазір елде 6 миллиондай көлік тіркелген. Астын сызып айтатыны, соның шамамен 41 пайызы 20 жылдан аса қолданыста жүр. Енді, көлікке 11 жылдан 20 жылға дейін уақыт өтсе – 30%, ал 21 жылдан асса – 50% жеңілдік жасалады.
Жандос Төлегенов, ҚР ҚМ Мемлекеттік кірістер комитетінің бас сарапшысы:

Мысалы көлік салығы 500 мың теңге болса, көліктің жылы 20 жылдан асқан болса, оларға 0,5 кф енгізіледі. Яғни, 500 мың теңгенің орнына жеке тұлғалар 250 мың теңге төлейді. Бұл жерде кф бойынша, барлық автокөліктерге қолданылады. Бұл жерде қозғалтқыш көлеміне қарамайды.

Саладағы тағы бір өзгеріс мүлік салығына қатысты. Егер мүлік салығының сомасы 1 млн теңгеден аз болса, азаматтар ағымдағы төлемдер бойынша есеп тапсырмайды. Есесіне, пайдаланылмайтын ауыл шаруашылығы жерлері үшін салық және төлем мөлшері 2 есе көбейеді.
Ләззат Нұрғалиқызы, экономист-сарапшы:

Жерді алып алып, пайдаланбай отырған азаматтарға біржағынан сигнал деп айтсақ болады. Бұл да біздің азаматтардың жауапкершілігін арттырады. Осы жасалып жатқан әрекеттер мемлекет бюджетінің 20 пайызға толықтырады деген болжам бар.

Сонымен қатар, пайдалы қазбаларды барлауға немесе өндіруге лицензия негізінде берілген жер учаскелерін пайдалану тарифтері ұлғайтылмақ. Жауапты министрлік бұл өзгерістердің басты мақсаты – әділетті салық жүйесін қалыптастыру екенін айтады.