544 мың студент ЖИ-ді басқару курсынан өтті

«AI-Sana» бағдарламасы аясында еліміздегі жетекші университеттер биылдан бастап оқу жоспарына жасанды интеллект пәндерін енгізді. Ондағы оқытушылар құрамының 54 пайызы арнайы курстан өткен.  Сондай-ақ, 30 жоғары оқу орны жасанды интеллект бағыты бойынша 38 білім беру бағдарламасын жүзеге асырып жатыр. Жалпы, AI-Sana - жасанды интеллект саласындағы дағдыларды дамытуға арналған бағдарлама. Оны кезең-кезеңімен іске асыру көзделген. Алғашқы лекте базалық білім беріледі. І-ші кезеңінде 544 мың студент Huawei, Coursera, Astana Hub платформаларында және жоғары оқу орындарында ЖИ-ді басқару курстарынан өтіп, сертификат алған.

Динара Щеглова,ҚР Ғылым және жоғары білім вице-министрі:

Аталған жұмыстар еңбек нарығындағы болашақ сұраныстар алдын ала болжауға бағытталған. Негізгі мақсат - келешекте қажет болатын құзіреттер мен дағдыларды меңгерген кадрларды даярлау.