Қос пара спортшыға жүлде бұйырмады

Пара жүзуден Сингапурде өтіп жатқан Әлем чемпионатының бесінші күні аяқталды. Бүгін Қазақстан атынан екі спортшы сынға түсіп, финалға дейін жолдама алды. Десе де жүлдегерлер қатарынан көріне алмады. Әуелі Паралимпиада ойындарының чемпионы Зульфия Ғабидуллина 50 метрге еркін стильде сынға түсті. S4 санатында бақ сынаған тәжірибелі отандасымыз жаһан біріншілігін 8-орынмен аяқтады. Шешуші сында барын салған америкалық спортшы чемпион болып қана қоймай, әлем рекордын жаңартты. Күміс пен қоланы Бразилия өкілдері еншіледі. Ерлерден S6 санатында 50 метрге еркін стиль бойынша жүлдеге таласқан Ержан Сәлімгереевке те медаль бұйырмады. Қазақстандық пара жүзуші 8-орыннан көрінді.