800 қызметкер болған кәсіпорында 35 адам ғана жұмыс істеп жатыр

Екібастұздағы «Қазақстандық вагон құрастыру компаниясында» қызметкерлер саны 800-ден 150 адамға дейін қысқарды. Қазіргі кезде тіпті тек 35 қызметкер жұмысын жалғастырып отыр. Қалғандары ақысыз демалыста екен.  Отандық вагон құрылысындағы дағдарысқа негізгі себеп – вагондарға мемлекеттік тапсырыстың азаюы болып отыр. Сенатор кәсіпорынның жұмысын тоқтату білікті кадрлардан айырылу, стратегиялық маңызды өндірісті банкротқа ұшырату және өңірдегі әлеуметтік шиеленіс қаупін туғызатынын атап өтті.

Ернұр Әйткенов, ҚР Парламенті Сенатының депутаты:

Қазақстандық вагон жасау компаниясын сақтау және одан әрі дамыту жөнінде шаралар қабылдауды сұраймыз. Вагон жасау кәсіпорындарын мемлекеттік қолдау шараларын әзірлеуді және іске асыруды, сондай-ақ жүк вагондарының қызмет ету мерзімін ұзарта беруді тоқтату мәселесін қарастыру қажет.