Астанада әлемдік және дәстүрлі діндер лидерлерінің съезі аяқталды

Кез келген дін әлемде бейбітшілік пен тұрақтылықты сақтау бағытында жұмыс істеуі керек. Астанада әлемдік және дәстүрлі діндер лидерлері бейбіт болашақтың бағдары осындай болуы керек деген ұйғарымға келді. Әріптесім Оңғар Алпысбайұлы қазір тікелей эфирге қосылуға дайын тұр. Оңғар, екі күнге созылған жиынның қорытындысы бойынша қандай да бір ресми құжат қабылданды ма?

Оңғар Алпысбайұлы, тілші:

Иә, жиын қорытындысы бойынша «Астана декларациясы» қабылданып, діндер мен мәдениеттер арасындағы диалогты нығайту, жаһандық сын-қатерлерге қарсы бірлескен әрекет ету міндеттері бекітілді. Құжатта отызға жуық тармақтан тұрады. Декларацияда әсіресе экстремизм мен ксенофобияға қарсы тұру, дінаралық және мәдениетаралық келісімді сақтау мәселелеріне ерекше назар аударылған. Жалпы сегізінші Әлемдік және дәстүрлі діндер лидерлерінің съезі бірнеше минут бұрын аяқталды. Бүгін де бірқатар маңызды мәселлер талқыланды. Оның ішінде жастармен жұмыс, цифрландыру, қоғамды ізгілендіру, экстремизмге қарсы күрес тақырыптары бар. Дін лидерлері бүгін татулық пен толеранттылық ортақ міндет екенін тағы да растды. Ал діннің қоғамдағы орны – бөліп-жару емес, біріктіру, адамгершілік, құрмет және келешекке қалатын аманат деді қатысушылар. Сонымен қатар қатысушылар алдағы съезді 2028 жылы да дәл осы Астанада өткізуге уағдаласты.