Бүгіннен бастап 25 мың жұмыскердің жұмыс кестесі өзгерді

Бүгіннен бастап Астанада бірнеше мемлекеттік және жартылай мемлекеттік ұйымдардың жұмыс уақыты өзгерді. Бұл жаңашылдық қаланың орталық бөлігіндегі жол кептелістерін азайту мақсатында енгізіліп отыр. Атап айтқанда, қала әкімдігі мен коммуналдық қызметтер таңғы сағат  07:30-да, ал кейбір мемлекеттік органдар мен жартылай мемлекеттік компаниялар жұмысын 07:30–08:00 аралығында жұмысқа кіріседі.

Мирас Әбдірахман, қалалық Ішкі саясат басқармасы басшысының орынбасары:

Жалпы алғанда, 25 мыңға жуық жұмыскерлердің жұмыс уақыты ауысты. Айта кету керек, халыққа қызмет көрсету орталықтары, әлеуметтік нысандардың жұмысы ауысқан жоқ.

Яғни, мектептер мен балабақшалар, ауруханалар, емханалар, сонымен қатар халыққа қызмет көрсету орталықтары бұрынғы жұмыс кестесімен қызмет ете береді. Жол кептелісін шешуге бағытталған бұл бастамаға елордалық тұрғындардың көзқарасы әртүрлі.