Орал жастары өзен жағасын тазалады

Оралда «Таза Қазақстан» экологиялық акциясы аясында жастар өзен жағалауын күл-қоқыстан тазартты. Тұрғындардың жауапсыздығынан қалдық алаңына айналған жерде сенбілік ұйымдастырылды. Студенттер мен ерікті жастар айналаны жинастырып, күл-қоқыстан арылтты. Бір кісідей жұмылып, аумақты әп-сәтте мұнтаздай етті. Акцияға жоғары медициналық колледж студенттері мен «Жастар рухы» жастар қанаты филиалының еріктілерінен құралған 50 жас қатысты. Тазалық науқаны жыл бойы жалғасады. Әр сенбілікті ерекше форматта өткізуге мән беріліп отыр.

Нұрсұлтан Сәрсенбаев, облыстық жастар ресурстық орталығы басшысының орынбасары:

Алдағы уақытта біз отбасылық деңгейдегі сенбілік өткіземіз. Яғни отбасы болып шығып, тазарту бойынша бір бірімен жарысады. Бұл «Таза Қазақстан» жалпыұлттық акциясы тек сенбілік болып қалмау керек, бұл жастардың кеудесінде елге, жерге деген үлкен патриоттық сезімді қалыптастыратын мектеп болатынына біз сенімдіміз.

Ардақ Мұратқызы