Жаңалықтарды Telegram арнамыздан оқыңыз!«Робот сот орындаушы». Жарты жыл бұрын енгізілген жоба тиімділігін көрсетті. Жеке сот орындаушылардың қызметін роботтар көрсетіп, халық игілігін көрді. Пайдасы сол -сайыппұл арқалаған біраз адамның ақшасы үнемделді. Енді бұл жобаның ауқымы кеңейеді. Бүгін Үкімет отырысында Әділет органдарын дамыту мен цифрландыру мәселесі қаралды. Самал Қабышеваның материалына назар салсақ.
Олжас Бектенов, ҚР Премьер-министрі:
Робот іске қосылған өткен жылдың тамыз айынан бері 125 мыңнан астам құжат орындалған. Ал рәсімдерден өту кезінде азаматтар 600 млн теңгеден астам қаражат үнемдеген.
Иә, 600 млн теңге үнемделді. Себебі роботтың жеке сот орындаушысынан айырмашылығы - қызметі үшін қосымша ақы тағы алмайды. Борышкер нақты өзінің айыппұлын, берешегін ғана төлеумен шектеледі. Қаражатын үнемдейді. Енді робот арқылы өндіріп алу 20-дан 40 айлық есептік көрсеткішке дейін ұлғайтылмақ. Яғни 160 мың теңгеге жуық қарызы барлар робот арқылы төлемін жасап, артық шығыннан арылады. Сондай-ақ «Өндіріп алушы мен борышкердің жеке кабинетін» жетілдіру мақсатында «Цифрлық ассистент» енгізіледі.
Ерлан Сәрсембаев, ҚР Әділет министрі:
Ассистент істің орындалу барысын толық көрсетеді. Бұдан былай осы платформада тараптар сот орындаушының әрекетіне қатысты шағымдана алады. Мүлікке салынған тыйымды, елден шығуға уақытша шектеуді алып тастау және борышкерлер тізілімінен шығару мәселесін автоматтандыру арқылы шешу жоспарлануда.
Бармақ басты, көз қыстыға жол жоқ. Жеке сот орындаушының әрбір әрекеті майшаммен қаралғандай, платформада анық көрсетіледі. Бұл қадамға себеп - жеке сот орындаушылардың үстінен шағым көбейген. Берешегін төлесе де, тізімнен алынбай, мүлікке салынған тыйымның әлегімен сарсаңға түскендер көп екен. Әділет органдарының қызметіне жасанды интеллект мүмкіндіктерін енгізіп, саланы дамытуға қатысты Үкімет басшысы жауапты министрлерге нақты тапсырмалар берді.
Самал Қабышева, тілші:
Цифрландыру сот-медициналық сараптамаға да енгізіледі. Осы мақсатта мәйітті зерттеу үшін виртуалды аутопсия енгізу жоспарлануда. Яғни, қайтыс болған адамның денесіне тілік жасамай, компьютерлік сканерлеу арқылы тексереді. Пышақ тимей, адам өлімінің негізгі себебі анықталады. Үкімет отырысында Әділет министрі Ерлан Сәрсембаев осылай деді.
Самал Қабышева
