Елде азық-түлік бағасы бір жылда 10 пайызға қымбаттаған

Елімізде әлеуметтік маңызы бар азық-түлік бағасы бір жылда 10 процентке қымбаттаған. Ұлттық статистика бюросының мәліметінше әсіресе күріш, сәбіз бен картоп бағасы айтарлықтай көтеріліп отыр. Ал сарапшылар бұған әдеттегідей тапшылық себеп дейді. Оның үстіне былтыр осы көкөністерді өсіретін егістік алқаптары азайған. Сөйтіп жетіспеушіліктен баға да қымбаттай түскен. Десе де тұрақтандыру қорларында азық-түлік жеткілікті және ол бағаны көтермей ұстап тұруға мүмкінді беретіні Үкіметте айтылған еді. Әрі әлеуметтік тауарларға шекті баға белгіленіп, құнды негізсіз шарықтататындармен күрес жүріп жатыр.

Досжан Маратұлы