Жаңалықтарды Telegram арнамыздан оқыңыз!
Алматылық еріктілер жыл басынан бері 200-ден астам қайырымдылық шарасын өткізді. 60 мың тоннадан астам гуманитарлық көмек жинаған. Шахарда 50 мыңға жуық ерікті, 30-дан астам волонтерлік ұйым бар. Белсенділер ертең Астанада өтетін халықаралық форумға қатысу үшін жолға жиналып жатыр. Сапарға шығар алдындағы соңғы жұмыстар пысықталып жатыр.
Раногүл Тохтабакиева – жиынға қатысушылардың бірі. Ол басқаратын ұйым қайырымды істермен қатар із-түзсіз кеткен адамдарды іздестіруге, түрлі төтенше жағдай кезінде құтқару жұмыстарына белсене қатысады.
Раногүл Тохтабакиева, ерікті:
Мемлекеттің еріктілерге, біздің жұмысымызға көңіл бөле бастағаны мені қуантады. Бұл форумның біз үшін маңызы зор. Себебі, шетелдік волонтерлармен тәжірибе алмасамыз, ақпаратпен бөлісеміз. Ерікті болам дейтін жастарды қатарымызға көбірек қосамыз.
16 жастағы Зере Мақсұтханның да алға қойған мақсаты көп. Еріктілер қатарына осыдан бір жыл бұрын ғана қосылған. Десе де, талапты жастың атқарған шаруасы мол.
Зере Мақсұтхан, ерікті:
Көбіне қарттар үйіне, балалар үйіне барамыз, әртүрлі кинокештер өткіземіз. Концерттер қоямыз. Экосенбілік өткіземіз. Қаламыздағы үлкен парктерді қоқыстан тазалап, қоршаған ортаға пайдамызды тигіземіз.
Астанадағы форумға 34 шет елдің делегаттары шақырылған. Бас-аяғы 400-ге жуық адам бас қоспақшы. 80 қатысушы – арнайы байқауда оза шауып, сайдың тасындай іріктелген еліміздің ең мықты еріктілері.
Жазира Оразқызы
