Теңіз кенішінде қосымша 1200 төсек-орын дайындалды

Атырау облысында эпидахуал күн өткен сайын ушығып барады. Теңіз кенішінде вирусқа шалдыққан жұмысшылардың көбеюіне байланысты қосымша 1200 төсек-орын дайындалды. Өңірдегі ахуалды меншікті тілшіміз Жандос Темірғали баяндайды.

 Жандос Темірғали, тілші:
Өңір вирус құрсауында қалды. Айналасы үш күннің ішінде 1700-ден астам адамнан ковид анықталды. Соңғы тәулікте 548 тұрғын індетке шалдықты. Науқастардың тең жартысынан көбі қаладан тіркеліп отыр. Ал, 73-і Теңіз мұнай кен орнының жұмысшылары. Қазір кеніште жағдай күрделі. Індет жұқтырған қызметкерлердің көбеюіне байланысты, сол жақтағы стационарда қосымша 1200 төсек-орын дайындалды. Бүгінде теңіздегі емдеу орнында 543 адам жатыр. Ал, өңірдегі инфекциялық ауруханаларда 276 науқас ем қабылдауда. 11-інің жағдайы ауыр. 2 адам көз жұмды. Індеттің алдын алу үшін мамандар екпе алу қажеттігін ескертеді. Денсаулық басқармасы таратқан соңғы ақпаратқа сай, 264 мың адам вакцина салдырды. 15 мыңы үшінші мәрте екпе салдырған.