Батыс Қазақстанда 13 ауыл жарықсыз қалды

Батыс Қазақстан облысында күн райының күрт бұзылуына байланысты жолдар жабылып, бірнеше елді мекен жарықсыз, сусыз қалды. 

Қалың тұман мен көктайғаққа байланысты өңірде республикалық жолдар жабылды. Әсіресе Атырау, Ақтөбе, Самара жаққа бағыт алған көліктер Оралдан шыға бере кері қайтарылды. Бұған қоса күннің күрт жылуы 7 ауданның халқына жайсыз тиді. Оның ішінде 13 ауылда электр сымдары үзіліп, жарық өшсе, 5 елді мекен сусыз қалды. 

Нұралы Мұсиев, Төтенше жағдайлардың алдын алу басқармасының бас маманы:
Электр желісіне мұздақ қатуының салдарынан бағандар құлап жатыр. Жалпы енді мүдделі органдар апатты жою бойынша жедел жұмыстар атқаруда. Осы мәселе бойынша комиссия құрылып, оқиға орнына шығып, анықталатын болады қанша бағандар құлағанын.

Қостанайда да күн күрт жылынып, қар аралас жаңбыр жауды. Соның салдарынан көктайғақ болып, мектептерде сабақ тоқтады. Балалар қашықтан оқуға көшті. Облыстық, республикалық маңызы бар бірнеше бағыттағы жолдар жабылды.

Дәуренбек Әбдібек