Павлодарда мектеп оқулығын сатып алуға 593 миллион теңге бөлінді

Павлодар облысында жаңа 2015-2016 оқу жылында шәкірттерді оқулықтармен қамтамасыз ету мақсатында 593 миллион теңге бөлінді, деп хабарлайды pavlodarnews.kz.

 «Өткен жылы оқулықтарды сатып алуға - 476 миллион, ал 2013 жылы 391 миллион теңге қаржы жұмсалған.  Жаңа оқу жылында биылғы жылы баспадан шыққан 4, 5, 6 және 11-сынып оқушылары оқулықтармен қамтамасыз етіледі. Сонымен қатар, 3-сынып оқушылары үшін ағылшын тілі, 7-сыныптың оқушыларына информатика пәнінен оқулықтар сатып алынады. Бұдан басқа, қосымша мектепалды және басқа да сынып оқушыларына арналған 2013-2014 жылы басылып шыққан кітаптар сатылып алынады», - деді облыстық Білім беру басқармасы басшысының орынбасары Тамара Иванова

Білім беру басқармасы ұсынған ақпаратқа сүйенсек, өңірде оқулықтардың қоры әр 4 жыл сайын жаңартылады. Қазіргі таңда өңір мектептерінің кітапханаларының әдебиет қорында 5 943 335 кітап бар, олардың 2 856 066-сы – пән оқулықтары.  

ФОТО: biznesoblast.com