Қостанай облысында ауа райына байланысты тәуліктік кезекшілік ұйымдастырылмақ

«Қазгидромет» РМК хабарлауынша, арктикалық циклонның әсерінен Қостанай облысының көпшілік аудандарында ылғалды ауа райы сақталады.

Аймақтық «Наша газета» порталының мәліметінше, соңғы 4-5 күнде Қарабалық, Меңдіқара, Амангелді аудандарында  жауын-шашын мөлшері 30-34 мм-ге дейін артқан.

Келесі апта облыста күн райы жаңбырлы болып, тұрақсыз ауа райы сақталады. Түнде ауа температурасы +5,+10, күндіз кей аймақтарда +15,+17 градус жылы болады.

Ауа райы тек тамыз айының екінші онкүндігінде +28,+30 градусқа дейін жылынады. 

Облыс әкімі Нұралы Сәдуақасов төтенше жағдайлар қызметкерлерімен өткен жиында оларға жергілікті билікпен тығыз байланыста болып, тәуліктік кезекшілік ұйымдастыруды тапсырды.