Бельгияда мыңдаған адам Пучдемонды қолдап шеруге шықты

Бүгін Брюссельде мыңдаған адам Каталонияның бұрынғы басшысы Карлес Пучдемон мен оның жақтастарын қолдап Орталық саябақта акция ұйымдастырды. Еуропаның түкпір-түкпірінен жиналған шерушілерге Пучдемонның өзі де барды. Таяуда ол әзірге Брюссельде қалып, «Каталония үшін бірге» партиясының сайлауалды кампаниясын жүргізетінін мәлімдеген еді. 

Пучдемон Каталонияда қазанның 1-де өткен Тәуелсіздік туралы референдумды заңсыз ұйымдастырды деген айыппен жақында тұтқындалып, кейін босатылды. Қазір онда сайлауалды үгіт-насихат науқанын жүргізу құқығы бар.  

Айта кетсек, Каталонияда желтоқсанның 21-де парламенттік сайлау өтеді. Оның қарсаңында  ұлтшылдар тәуелсіздік мәселесін көтеріп, жеңіске жетуден үмітті.

Мақпал СЕРЖАНҚЫЗЫ