Елорданың ең үлгілі жанұясы анықталды

Бүгін Нұр-Сұлтан қаласында «Мерейлі отбасы» байқауының қалалық жеңімпаздары марапатталды. Биыл сайысқа қатысу үшін 60 жанұя өтініш берген. Араларында көпбалалы ата-аналар мен еліміздің дамуына айтарлықтай үлес қосқан жандар бар.

Қазылар алқасы өнегелі тәрбиесімен, бірлік-ынтымағымен көпке үлгі болған әулеттердің ішінен үздігін анықтау оңайға соқпағанын айтады. Нәтижесінде 7 отбасы жүлделі орынға лайық деп танылды. Ал бас жүлдені Қойбақовтар әулеті иеленіп, республикалық байқауға жолдама алды.

Сейітхан Қойбақов, қалалық байқаудың жеңімпазы:

- Дамыған отыз елдің қатарына кіреміз деп жатырмыз. Соған әр жанұя өз үлесін қосса, сонда ғана үлкен, күшті мемлекет боламыз. Сондықтан оған біздің әкімшіліктер, өңірлер көп көңіл бөліп жатыр.

Шерхан ЖАМБЫЛҰЛЫ