Қарағанды облысында 814 гектар жер өртеніп кетті

Жаздың аптап ыстығы басталмай жатып, Қарағанды облысында 814 гектар жер өртеніп кетті. Абырой болғанда, ешкім зардап шеккен жоқ. Синоптиктер алдағы үш ай жауын-шашынсыз, құрғақ болатынын айтады. Демек, тілсіз жаудан келетін қауіп сейілген жоқ. Сондықтан Төтенше жағдай қызметі дайындықтарын пысықтап, Жаңарқа ауданының маңында оқу-жаттығу өткізді. Оған 70-тен астам адам мен 20 техника қатысты.

Қазіргі күні облыс аумағында Қарқаралы мен Бұйратау ұлттық табиғат паркі және 6 орман шаруашылығы бар. Оған мыңдаған гектар жайылым жерлерді қосыңыз. Айта кетейік, былтыр өңірде 20-дан астам дала өрті тіркеліп, 4 мың гектар алқап жанып кеткен.

Ибрагим Күлшімбаев, Қарағанды облыстық ТЖД басшысы:

- Бұл - өте қажетті және өрт қаупті кезінде керекті оқу-жаттығулар. Біздің «Қазгидрометтің» мәліметі бойынша, биыл жазда ыстық болады және жауын-шашын аз болады деп болжанып отыр.

 Руслан НҰРЛАНҰЛЫ