Өскеменде жер үйлерді тасқыннан қорғау үшін Үлбі өзенінің суын ескі арнаға бұрады

Ол үшін Согра елді мекенінің тұсындағы 5 шақырымға жуық арнаны тазартып, кеңейту қажет. Бірнеше жыл бұрын судың бағыты өзгеріп, ықшам аудандағы үйлердің іргесіне дейін жақындады.

Жыл сайын көктемде Үлбі өзені көл болып жайылып, тұрғындардың үрейін туғызады. Су арнасы соңғы 20 жылда бірде-бір рет тазаланбаған. Жергілікті билік өзен суын ескі арнаға бұру үшін арнайы жобаны қолға алды. Алайда, жұмысты бастау үшін қомақты қаржы керек.

Қаныш Мұқажанов, Төтенше жағдайлар бойынша бас инспектор:

- Қазір жоспар жасалып қойды. Мемлекеттік сараптамада. Енді осы 1-2 айда шығады, деп отырмыз. Одан кейін ары қарай қосымша ақша облыстан немесе республикадан сұраймыз. 800 миллион теңгедей қаражат керек.

Берік КӨШЕРБАЙ