Жаңалықтарды Telegram арнамыздан оқыңыз!Астанада биыл 15 адам ашық құдыққа түсіп кеткен. Мәжіліс депутаты Сергей Симонов Премьер-министрге жолдаған сауалында осылай деді. 2018 жылы қақпасыз жатқан люктер жайлы 2800 өтініш түскен. 21 адам құдыққа түсіп кеткен, 1 адам қайтыс болды. Ал 2019 жылдың екі айының өзінде 500 шағым түсті. Елімізде металл қабылдау және өткізу орындарының қызметі реттелмеген. Сондықтан, ол жоғарыда айтылғандарды заңға тәуелді актілер деңгейінде реттеуді сұрады.
Сергей Симонов, ҚР Парламенті Мәжілісінің депутаты:
- 2000 жылдардың басында кәріз құдықтарының қақпалары, телекоммуникациялық сымдар, су құбырлары жаппай ұрланатын. Сол кезде Үкімет түрлі-түсті және қара металдарды өткізуді заң деңгейінде реттей алатын шаралар қабылдады. Нәтижесінде ондай жағдайлар аз болды. Алайда, 20 жыл өткен соң мұндай ұрлықтар қайта жасала бастады.
Ал оның әріптесі Василий Олейник еліміздегі лифтілердің мәселесін көтерді. Айтуынша, Қазақстандағы 23,5 мың лифтінің 40 пайызға жуығы жарамсыз. Бұл мәселе көбіне Алматыда өзекті болып тұр, мұнда 1900 лифтіні ауыстыру қажет. Семейде 127 лифтіні ауыстыру қажет. Олар 30 жылдан бері пайдаланылып келеді. Бұған 900 миллион теңгеге жуық қаржы керек. Бұзылған лифтілер тұрғындардың өміріне қауіп төндіреді деп тиісті министрлікке депутаттық сауал жолдады.
Индира БЕГАЙДАР
