Балалар үшін қауіпсіз сайттар тізімі жасалды

Оған «Ақ сайттар» деген атау берілген. «Болашақ» қауымдастығы бастамашы болған жобаның тұсаукесері Орталық коммуникациялар қызметінде өтті. Тізімге жеткіншектердің таным-түсінігі мен психологиялық дамуына кері әсер етпейтін сайттар ілікті. Олардың саны әзірге - 3556. Оның 500-і қазақстандық. Ниет білдіргендер сайт тізімін тапсырыс арқылы алып, қолдана алады. «Ақ сайттар тізімі» пилоттық жоба ретінде 1 желтоқсаннан жұмысын бастайды.

Бахтияр Мәкен, «Болашақ» қауымдастығы кеңесі басшысының міндетін атқарушы: 

 - Сараптама көрсетіп отырғандай, Қазақстандағы ата-аналардың 57 пайызы балалары интернеттен өз жасына сай келмейтін мәліметті алуы мүмкін деп қауіптенеді екен.  Ал, 18 пайызы балаларының интернетте не қарап отырғанынан мүлде хабарсыз болып шықты. Сондай-ақ, жеткіншектердің 6 пайызы компьютер ойындарына әуестенген. Ата-аналар интернетте балалардың оқуына болмайтын мәліметтер жетерлік екенін білуі керек. Бұл тұрғыда «Ақ сайттар тізімін» қолдану - маңызды қадам.

Досымжан ЕРМҰРАТ