Астана маңындағы орман алқабы 2020 жылға қарай 100 мың гектарға жетеді

Бұл туралы бүгін Мемлекет басшысы елорданың «жасыл белдеуін» аралау барысында мәлімдеді. Қазіргі уақытта «жасыл белдеуде» 10 миллионға жуық ағаш пен 2 миллиондай бұта өсіп тұр.  «Астана маңындағы орманды Бурабай орманымен қосу міндеті іс жүзінде орындалды», - деді Елбасы Нұрсұлтан Назарбаев. 

Жаз мезгілінде Астананы жағалаған «жасыл белдеуді» аралауды Мемлекет басшысы дәстүрге айналдырды. Биыл да жалғастырды. Жайқалған жасыл алқапты көкте тік ұшақпен тамашалады. Кешегі кішкентай талдар бүгіндері ну орманға айналған.

Белдеуде қазір аң-құстың түр-түрі бар. Орман алқабын ондаған марал мен елік мекен етеді. Зиянкес жәндіктерді жоятын қырғауыл да бар мұнда. Бүгін Нұрсұлтан Назарбаев белдеуге тағы бірнеше құс жіберді.