Шұғыл құтқару қызметіне ермек қылып хабарласатындар көбейді

112 шұғыл құтқару қызметіне бір айда 75 мыңға жуық қоңырау шалынады. Бұл тек Астана қаласы бойынша. Осы қоңыраулардың көбінің бұл қызметке қатысы жоқ. Яғни, қисынсыз сұрақтармен өзгенің де, өзінің де уақытын алып, арнайы қызметтің жұмысына кедергі келтіреді.

112 - бұл төтенше жағдай болған кезде, шұғыл көмекке зәру болғанда хабарласатын қызмет. Алайда, тек өткен жылы ойын көріп, хабарласқан балалардың саны 7886, биылғы ақпанда 5374-ке жеткен. Тіпті, ұялы телефонында қанша бірлік қалғанын білейін деп қоңырау шалғандар 6303, өзге де ақпарат алу үшін 7 мыңнан астам қоңырау түскен.