Астанадағы ХҚКО-да уақытша тіркеуге тұратын адамдар саны көбейген

Халыққа қызмет көрсету орталықтарына келушілердің қатары күнделіктімен салыстырғанда 15-20 пайызға өскен. Әдетте ел бойынша мекемелерге 6 мың адам келсе, бүгін олардың саны 8 мыңнан асып кеткен.

Орталық қызметкерлері халықтың көбеюін демалыс күндерінің аяқталуымен және уақытша тіркеу туралы жаңа ереженің енгізілуімен байланыстырып отыр. Қаңтардың 7-і күні күшіне енетін жаңа талап Халыққа қызмет көрсету орталықтарының жұмыс кестесіне өзгеріс енгізді.

Адамдар алдағы апта ұзынсонар кезекте тұрып қалмас үшін сенбі мерекелік күн екеніне қарамастан, мекемелер сағат 15-00-ге дейін қызмет көрсететін болды. Ал, басқа күндері де халық саны күрт өсіп жатса, орталықтарға қосымша мамандар жұмылдырылатын болды.

Альбина ӘШІМ