Жаңалықтарды Telegram арнамыздан оқыңыз!Жер реформасы жөніндегі комиссияның кезекті көшпелі отырысы Алматы облысында өтеді. Бұл туралы Жер реформасы жөніндегі комиссияның құқықтық топ жетекшісі Мұхтар Тайжан мәлім етті.
«Қазір ғана Комиссияның штабынан тел соқты, кезекті отырысымыз Алматы облысында өтеді, дүйсенбі күні, 20.06.16. Байсерке-Агро деген фирманың территориясында, сағат 10.00. Келіңіздер, қатысыңыздар. Жер жайлы ой-пікірлеріңізді ашық айтыңыздар», - деп жазды блогер facebook әлеуметтік желісіндегі жеке парақшасында.
Естеріңізге сала кетейік, бұған дейін комиссияның алғашқы көшпелі отырысы Ақмола облысының орталығы Көкшетау қаласында өтті. Отырыс 4 сағатқа созылды.
Онда өңір әкімі Сергей Кулагин өңірдегі 300 мың гектар жер қытайларға жалға беріледі деген ақпараттың жалған екенін айтты. Сондай-ақ жиын барысында әкім меншігінде қанша гектар жер бар екені де мәлім болды.
«Бұл туралы бұған дейiн бiрнеше мәрте айтылып, жазылды. Мен билiктен кетiп, бизнестi қолған алған адамдардың бiрiмiн. Бизнеспен 5 жыл айналыстым. Қазақстан азаматы ретiнде менiң жер алып, ауыл шаруашылығымен айналысуға құқығым болды ма? Болды! Әрине, менi билiкке қайта келгеннен кейін, жердi туысқандарыма жалға бердiм. Барлығы бүгiнде 80 мың гектар егiстiк жерім бар», - дейді Сергей Кулагин.
