Қазақстанда 5 мыңнан астам ғалым 5 айдан бері жалақы алмай жүр

Елдегі 207 ғылыми-зерттеу институтына бюджеттен қаржы үш бағыт бойынша бөлінеді. Биылғы жоспарға сәйкес базалық бағытқа – 2,5 миллиард, грант бойынша - 11 миллиардтан астам теңге және соңғысы, мақсатты-бағдарламалық жұмысқа - 6 миллиард теңге бөлінуі тиіс еді. Бас-аяғы салаға биыл бюджеттен - 20 миллиард 500 миллион теңге бөлінуі керек. Дегенмен, жыл орталаса да, бұл қаражаттың тек 60 пайызы ғана аударылған.

Яғни, қазына қаржысы толық бөлінбегендіктен, мөлшері қысқарғандықтан, ғалымдардың айлығы берілмей отыр. Ал, министрлік мәселені шешу үшін Үкіметтен қосымша қаражат бөлуді сұраған.

Вице-министрдің айтуынша, кей ғылыми институттарға айлық аударылған. Бір анығы бұл биыл ғана туындаған проблема емес. Ғалымдар жылда жаңа жылдан кейін ескі түйткілге тап болады. Яғни, айлықтың дәстүрлі кептелісі. Осыған налыған сала өкілдері жұмыс жүйесін тапса екен дейді.

Азамат НҰҒЫМАНОВ