Қорғаныс министрілігі «KADEX-2016» көрмесі қарсаңында журналистер арасында байқау жариялады

Маусым айының басында Астанада өтетін әскери-техникалық жабдықтардың «KADEX-2016» халықаралық көрмесі қарсаңында журналистер арасында байқау жарияланып отыр. Бұл байқауды Қазақстан Республикасы Қорғаныс министрлігі ұйымдастыруда.

Халықаралық көрмені насихаттау үшін журналистерді тартуды мақсат тұтқан байқау баспасөз, электронды ақпарат құралдары өкілдерінің арасында өтеді. Сонымен қатар, әскери көрме тақырыбын жазып жүрген штаттан тыс авторлар да байқауға қатысуға мүмкіндік алған. Байқауға қатысу үшін жолданатын материалдар маусым айының 10 жұлдызына дейін қабылданады.

Байқау барысында «Баспасөздегі үздік мақала», «Интернет-басылымдардағы үздік публикация», «Үздік телесюжет», «Үздік радиосюжет», «Үздік фото репортаж» аталымдары бойынша жеңімпаздарды анықтау көзделіп отыр. Байқаудың шарттары мен ережелері туралы Қорғаныс министрлігінің сайтындағы KADEX бөлімінен толық ақпарат алуға болады.